"Ауруханада дәрігерлер жалған дипломмен жұмыс істеп жүр": Министрлік жауап берді
Бұрынғы денсаулық сақтау вице-министрі Олжас Әбішев қазақстандық емханаларда медицина қызметкерлерінің жалған дипломмен жұмыс істеп жүргенін айтты.
Денсаулық сақтау министрлігі бұл мәлімдемені жоққа шығарды.
"2017 жылдан 2020 жылға дейін Олжас Әбішев Денсаулық сақтау министрлігінде жұмыс істегенін, денсаулық сақтау мен медициналық білім беруді цифрландыру мәселесіне жетекшілік еткенін айта кету керек. Дәл осы кезеңде медицина қызметкерлерін сертификаттау сияқты медициналық жоғары оқу орындары мен колледждердің дипломдарын тіркеу бәсекелі ортаға берілді, бұл сыбайлас жемқорлық пен құжаттарды бұрмалауға негіз болды. Содан кейін басқа ақпараттық жүйелермен интеграция жағдайында білім беру құжаттарын электронды форматқа ауыстыру ғана дипломдардың түпнұсқа екенін анықтауға мүмкіндік беретіні анық болды. Бірақ, өкінішке қарай, бұл іс жүзінде көрсетілген кезеңде жүзеге асырылмады. 2020 жылы Денсаулық сақтау министрлігі Ғылым және жоғары білім министрлігімен бірлесіп, диплом бұрмалау сияқты құбылысты жою үшін медициналық жоғары оқу орындарының дипломдарын толық цифрландыру жұмысын бастады. Бүгінгі таңда QR-кодты қолдана отырып, ұлттық білім беру дерекқорындағы кез келген дипломның түпнұсқалығын тексеруге болады", – делінген министрлік хабарламасында.
Сонымен қатар, 2023 жылдан бастап қазақстандық колледж түлектері QR-коды бар дипломдар алады, бұл құжаттар цифрлық форматта "электронды үкімет" порталының жеке кабинетінде және eGov Mobile мобилдік қосымшасында қолжетімді болады.
Егер бұл қағаз нұсқаларына қатысты болса, онда диплом бланкілері қатаң есеп құжатына жатады.
Олар бүлінген жағдайда оларды жою жөнінде акт жасалады, актіге диплом нөмірі бар бланктің бөлігі бекітіледі.
Сондықтан жалған диплом алу өте қиын.
Медициналық дипломдардың цифрлық есебіне көшу жұмыс берушілерге дипломның түпнұсқалығына қатысты медициналық жоғары оқу орындарына сұраныс жасамауға, QR-кодтар арқылы цифрлық базаны пайдалануға мүмкіндік береді.