Астанада Республика күніне орай "Түркістан" көрмесі ұйымдастырылды
Бас қалада Түркістанның бай тарихын баяндайтын көрме ашылды, деп хабарлайды Teznews.kz ақпараттық порталы Мәдениет және ақпарат министрлігінің баспасөз қызметіне сілтеме жасай отырып.
Республика күні қарсаңында Астанада төрткүл дүниенің тұғырлы мекеніне айналған Түркістанның бай тарихына арналған көрме ұйымдастырылды.
Түркі мемлекеттері ұйымының 10-шы мерейтойлық саммитіне орайластырылған іс-шараны Қазақстан Республикасы Мәдениет және ақпарат министрлігі өткізді.
Тарихтан сыр шерткен көрменің мақсаты – дала мәдениетінің әлемдік өркениеттегі ерекше орнын көрсету, түркі мәдени мұрасын кеңінен насихаттау, түркі мемлекеттері арасындағы мәдени ынтымақтастықты одан әрі тереңдету.
Іс-шараға Парламент депутаттары, жоғары оқу орындарының ректорлары, тарих және филология ғылымдарының докторлары, профессорлар, мұражай мен кітапхана өкілдері қатысты.