Алматы облысында 32 жастағы ер адамды атқан күдікті ұсталды
Алматы облысында 32 жастағы ер адам оққа ұшты. Қылмыс Талғар қаласында болған. Күдікті шекарадан өтпек болған жерінде ұсталды, деп хабарлайды Teznews.kz порталы Polisia.kz сайтының ресми Telegram-арнасына сілтеме жасап.
Полицияның хабарлауынша, Талғар полицейлері 32 жастағы азаматты өлтірген болуы мүмкін деген күдіктіні ұстаған.
"24 қаңтар күні сағат 13:48 шамасында Талғар ауданының полиция басқармасына оқ жарақаты бар 32 жастағы азаматтың денесі табылғаны туралы хабарлама түсті. Аталған дерек Қылмыстық кодекстің 99-бабының 1-бөлігі бойынша жоғарыда көрсетілген бөлімшенің СДТБТ-да тіркелді" делінген хабарламада.
Полиция 1990 жылғы күдікті, Талғар ауданының тұрғынын Қордай ауылындағы шекарадан өтпек болған кезде ұстағанын айтты.
Қазір ол уақытша ұстау изоляторына қамалды.