Түркиядағы жер сілкінісіне байланысты 8 адам қамауға алынды

Түркиядағы жер сілкінісіне байланысты 8 адам ұсталды. Оған жер сілкінісі кезінде қираған ғимараттар құрылысынан анықталған олқылықтар себеп болып отыр, деп хабарлайды teznews.kz порталы Ulysmedia.kz сайтына сілтеме жасап.

Бұған дейін Хатай қаласында жер сілкінісі кезінде құлаған Rönesans Rezidans тұрғын үй кешенінің сәулетшісі Мехмет Яшар Джошкунның Ыстанбұл әуежайында ұсталғаны хабарланды. Жергілікті БАҚ мәлім еткендей, ол шетелге қашпақ болған.

Сондай-ақ, «Анадолу» агенттігі таратқан ақпаратқа сәйкес, зілзаладан зардап шеккен провинцияларда жер сілкінісіне қатысты қылмыстарды тергеу жөніндегі бөлімдер құрылады.

Еске салсақ, 6 ақпанда Түркияда жеті балдан асатын екі жер сілкінісі болды (жергілікті уақыт бойынша 4:17-де – 7,7 балл және 13:24-те – 7,6 балл). Жүздеген афтершокпен жалғасқан жерасты дүмпуі елдің 10 провинциясында, сондай-ақ көршілес мемлекеттерде де сезілді.