Үстел теннисінен әлем чемпионатында Алан Құрманғалиев жүлдегер атанды

Тунисте үстел теннисінен жасөспірімдер арасында өтіп жатқан әлем чемпионатында қазақстандық Алан Құрманғалиев жүлдегерлер қатарына қосылды, деп хабарлайды Teznews.kz порталы ҚазАқпарат сайтына сілтеме жасап.

Қарағандылық А.Құрманғалиев (бапкері Эльмира Алиева) мысырлық Хана Годамен бірге аралас жұпта жартылай финалға шықты.

Осылайша, қазақстандық-мысырлық жұп кемінде қола жүлдеге ие болады. Олар 1/8 финалда пуэрторикалық Энрике Риос – бразилиялық Сенага Ширайды тізе бүктірді. Ал ширек финалда франциялықтар Натан Лам – Гаэтана Блэдадан айласын асырды.

Сөйтіп, А.Құрманғалиев Қазақстан үстел теннисі тарихында алғаш рет әлем чемпионатының жүлдегері қатарынан табылып отыр.

Жартылай финалдық бәсеке желтоқсанның 8-інен 9-ына қараған түні өтеді. Сонымен қатар А.Құрманғалиев жекелей сында да бақ сынайды.