Үкімет мүшелері Екібастұзға барды
ҚР үкіметі басшысы Әлихан Смайыловтың тапсырмасы бойынша премьер-министрдің орынбасары Серік Жұманғарин мен төтенше жағдайлар министрі Юрий Ильин Екібастұзға келді. Бұл туралы primeminister.kz сайтына сілтеме жасап, Teznews.kz порталы хабарлайды.
Премьер-министрдің ресми сайтының мәліметінше, энергетика вице-министрі Жандос Нұрмағанбетов апат орнында жүр.
"Үкімет мүшелерінің міндеттері – апаттың себептерін анықтап, зардап шеккен тұрғындардың кезек күттірмейтін мәселелерін шешу. Төтенше жағдай зардаптарын жедел жою ісі бақылауға алынды" делінген хабарламада.
Қазіргі уақытта жылу электр орталығында 6 қазандық жұмыс істеп тұр.143 көп қабатты және 132 жеке үйге, сондай-ақ 13 әлеуметтік нысанға жылу беру қалпына келтірілді. 21 учаскенің 20-сында жөндеу жұмыстары аяқталды. Проблемалы мәселелерді анықтау мақсатында үйлерді аралау жалғасып жатыр. Қалада азаматтар үшін 14 жылыту пункті жасақталған.